Saturday, 20 April 2019

കവിത

മൂന്ന് കവിതകൾ

കല്ല് 


പ്രളയത്തിൽ തകർന്ന അമ്പലത്തിൽ
നിന്നും ഒലിച്ചുപോയ വിഗ്രഹം
മറ്റൊരുനാട്ടിൽ മണ്ണടിഞ്ഞുകിടന്നു.

പാറപ്പൊട്ടിയുണ്ടായ കല്ല്
കൊത്തിയുണ്ടാക്കിയ വിഗ്രഹം
കല്ല് പൊടിഞ്ഞുണ്ടായ മണ്ണിൽ കിടന്നു.

കല്ല് വീണ്ടും കല്ലായിത്തീർന്നു.

വെള്ളം 


പ്രളയാനന്തരം പുഴവെള്ളത്തിൻ ഒരു പങ്ക്
വയൽവക്കത്തെ കുഴിയിൽ കെട്ടിക്കിടന്നു.

കൂട്ടംതെറ്റിപ്പോയ ഒരാളെപ്പോലെ
പുഴയിലേക്കുള്ള വഴിയറിയാതെ.

പ്രളയത്തെ കാത്ത് മുഷിഞ്ഞു,
ഒടുവിൽ  മണ്ണിന്നാഴം തേടി.

വിത്ത്


പലനിലക്കെട്ടിടങ്ങൾക്കിടയിൽ
വെട്ടിമാറ്റപ്പെടാതെ ശേഷിച്ച മരം,

മരത്തിന്റെ ചില്ലകളിൽ അങ്ങിങ്ങായി കായ്കൾ,

കായ്കൾക്കുള്ളിൽ വിത്തുകൾ —
ഭൂമിയുടെ ഗർഭത്തിൽ കാടിന്റേതെന്നപോലെ.

1992 ജുലൈ 21ന് വയനാട് ജില്ലയിലെ മീനങ്ങാടിയിൽ ജനനം. 'വെയിൽ' എന്ന പേരിൽ കവിതകളുടെ ചാപ്ബുക്ക് 2017ൽ പ്രസിദ്ധീകരിച്ചു. കൊച്ചിയിൽ താമസം. കൂടുതൽ അറിയാം »

Contact