Thursday, 29 August 2019

റ്റൊമാസ് ട്രാൻസ്ട്രോമർ

ഏപ്രിലും മൗനവും

വസന്തം വിജനമായി കിടന്നു.
ഒന്നും പ്രതിഫലിപ്പിക്കാതെ
എനിക്കരികിലൂടെ ഒഴുകുകയാണ്
ഇരുണ്ടവയലറ്റ് നിറത്തിൽ ഒരു തോട്.

ചില മഞ്ഞപൂവുകൾ മാത്രം
തിളങ്ങിനിൽക്കുന്നു.

വയലിൻ അതിന്റെ
കറുത്ത പെട്ടിയിലെന്നപോലെ
എന്റെ നിഴലിൽ ഞാൻ
വഹിക്കപ്പെടുന്നു.

എനിക്കു പറയാനുള്ള ഒരേയൊരു കാര്യം
എത്താനാകാത്തിടത്തു നിന്നു മിന്നുന്നു
—പലിശക്കാരന്റെ കൈവശമുള്ള
പണയപ്പണ്ടം പോലെ.

റ്റൊമാസ് ട്രാൻസ്ട്രോമർ (1931-2015): നൊബേൽ സമ്മാനജേതാവായ സ്വീഡിഷ് കവി.

പരിഭാഷകന്റെ കുറിപ്പ്: റോബർട്ട് ബ്ലൈയുടെ ഇംഗ്ലീഷ് പരിഭാഷയെയാണ് ഈ മൊഴിമാറ്റത്തിനായി പരിഗണിച്ചത്. പാറ്റി ക്രേനിന്റെയും റോബിൻ ഫുൾട്ടന്റെയും പരിഭാഷ പദാനുപദമായി മാത്രം അനുഭവപ്പെടുകയും തെളിച്ചം കുറവാണെന്നു തോന്നുകയും ചെയ്തതിനാൽ ആണ് ബ്ലൈയുടെ പരിഭാഷയെ പൂർണ്ണമായും ആശ്രയിച്ചത്. ബ്ലൈയും ട്രാൻസ്ട്രോമറും തമ്മിലുള്ള ബന്ധവും ഇരുവരും തമ്മിലുള്ള കാത്തിടപാടുകളും അറിയുന്നതിനാൽ ട്രാൻസ്ട്രോമറിൽ ബ്ലൈ എടുക്കുന്ന സ്വാതന്ത്യത്തെ ഞാൻ അംഗീകരിക്കുന്നു. അതേ സ്വാതന്ത്ര്യം ഈ കവിത മലയാളത്തിലാക്കാനും എടുത്തിരിക്കുന്നു.


കൂടുതൽ മൊഴിമാറ്റങ്ങൾ ഇവിടെ നിന്നും വായിക്കാം. 

1992 ജുലൈ 21ന് വയനാട് ജില്ലയിലെ മീനങ്ങാടിയിൽ ജനനം. 'വെയിൽ' എന്ന പേരിൽ കവിതകളുടെ ചാപ്ബുക്ക് 2017ൽ പ്രസിദ്ധീകരിച്ചു. കൊച്ചിയിൽ താമസം. കൂടുതൽ അറിയാം »

Contact