Sunday, 4 August 2019

റ്റൊമാസ് ട്രാൻസ്ട്രോമർ

മുഖാമുഖം

ഫെബ്രുവരിയിൽ ജീവിതം നിശ്ചലമായി.
പക്ഷികൾ പറക്കാൻ മടിച്ചു, ആത്മാവ്
മണ്ണിനെതിരെ ഇഴഞ്ഞു — കെട്ടിയിട്ട
കുറ്റിയിലുരസുന്ന വള്ളം പോലെ.

എനിക്കു പുറംതിരിഞ്ഞ് മരങ്ങൾ നിന്നു
പുൽത്തണ്ടുകൾ മഞ്ഞിന്നാഴമളന്നു
മഞ്ഞിൻപുറത്തെ കാൽപ്പാടുകൾ പഴകി
ഒരു താർപ്പായുടെ കീഴിൽ, ഭാഷ ചിതറി.

ഒരു ദിവസം ജനലിലെന്തോ വന്നെത്തി.
ജോലി നിർത്തി ഞാനതു നോക്കി.
നിറങ്ങൾ ജ്വലിച്ചു. എല്ലാം തിരിഞ്ഞുമറിഞ്ഞു.
ഭൂമിയും ഞാനും നേർക്കുനേർ കുതിച്ചു.

: നൊബേൽ സമ്മാനജേതാവായ സ്വീഡിഷ് കവി.  

റോബർട്ട് ബ്ലൈ, പാറ്റി ക്രേൻ, റോബിൻ റോബെർട്ട്സൺ, റോബിൻ ഫുൾട്ടൺ എന്നിവരുടെ ഇംഗ്ലീഷ് പരിഭാഷകളെ അടിസ്ഥാനമാക്കിയാണ് ട്രാൻസ്ട്രോമറുടെ കവിതകൾ ഞാൻ മലയാളത്തിലേക്ക് മാറ്റിയിരിക്കുന്നത്. കൂടുതൽ കവിതകൾ ഇവിടെ നിന്നും വായിക്കാം. 

1992 ജുലൈ 21ന് വയനാട് ജില്ലയിലെ മീനങ്ങാടിയിൽ ജനനം. 'വെയിൽ' എന്ന പേരിൽ കവിതകളുടെ ചാപ്ബുക്ക് 2017ൽ പ്രസിദ്ധീകരിച്ചു. കൊച്ചിയിൽ താമസം. കൂടുതൽ അറിയാം »

Contact