കാഴ്ചകളെ ഇരുവശത്തേക്കും
തള്ളിനീക്കി പിന്നിലാക്കി
കുതിച്ചുപായുന്നു കാറ്.
സൈഡ്മിറർവഴി കാണാം:
നടന്നുനടന്നു വിണ്ടുകീറിയ
പാദങ്ങളുമായി നിന്നുപോയവരെ,
റോഡുമുറിച്ചുകടക്കാനാകാതെ
നോക്കിനിൽക്കുന്നവരെ,
കുടിയൊഴിപ്പിച്ച കാട്ടിൽനിന്നും
പോകാതെനിന്നുതനിച്ചായ മരങ്ങളെ,
വണ്ടിയിടിച്ചുചത്ത ജന്തുവിനെ തിന്നാൻ
കടിപിടികൂടും പട്ടികളെ, കാക്കകളെ.
കൺമുന്നിൽ തടയുന്നതിനെയെല്ലാം
നീക്കംചെയ്യുന്നുണ്ട്
വൈപ്പർ.
അറ്റമുണ്ടോയെന്നറിയാതെ
നീണ്ടുകിടക്കുന്നു പാത.
(മാധ്യമം ആഴ്ചപ്പതിപ്പ്)